خلال العشاء التكريمي الذي أقيم للبطريرك الراعي في مطعم خيرالله ألقى الشاعر عصام بارود قصيدة ترحيبية هذا نصّها
عا خطى الراعي يا راعي إنت راعي يا رسول الخير شو الداعي
حامل بإيدك غصنة الزيتون و بين الشرق و الغرب بتراعي
يا بطريرك الشرق صار الشرق مجنون أرض القداسة خنادق قلاعي
صار الفكر بقعر الجهل مسجون قلام الحضارة السن أفاعي
يا سيد بكركي بكركي قدرها تكون فوق الحدود الضيقة ساعي
بلكي بصلاتك هالوجع بيهون و بلكي بعصاتك هالبحر ينشق
و نقطع معك عالبر يا راعي
يا مرحبا يا متين يا أرض الإبا عا وهب ذرة حق المتيني أبا
خلقتي عظيمة من زمان كتير و كل ما الزمن يشيب بتزيدي صبا
بموسم العز يا ضيعتي لبستي الحرير و كنت كرم معصور بالعتم اختبا
و كلما البيادر تنتلي يفور الخمير و ريحة خبز اماتنا ما أطيبا
هللي يا متين للضيف الكبير و رددي يا ألف أهلا و مرحبا
إنت العطيت التوب من زرعك كتير و عندك بقلبك حب دافي للعبا
من دير مار يوسف تبصر الفكر الضرير و بصمة إبن المتين صعبة تحجبا
و نحنا منشبه كل لبنان الكبير و هيدي ضيع لبنان من الله هبا
يا بطريرك الشراكة يا حامي المصير أهلا و سهلا فيك بأرض المتين
دروز و نصارى ألف أهلا و مرحبا